ຕອບສະໜອງຕາມການເຊື້ອເຊີນຂອງພັກປະຊາຊົນກຳປູເຈຍ, ຄະນະຜູ້ແທນຂັ້ນສູງ ພັກ ປປ ລາວ ນຳໂດຍ  ທ່ານ ຄຳພັນ ພົມມະທັດ, ກຳມະການ ກົມການເມືອງ, ເລຂາທິການສູນກາງພັກ, ຫົວໜ້າຄະນະໂຄສະນາອົບ ຮົມສູນກາງພັກ ພ້ອມດ້ວຍຄະນະ ໄດ້ເດີນທາງໄປຢ້ຽມຢາມ ແລະ ເຮັດວຽກ ທີ່ຣາຊະອານາຈັກກໍາປູເຈຍ ແຕ່ວັນທີ 28 ຕຸລາ ຫາ 01 ພະຈິກ 2019.

    ຕອບສະໜອງຕາມຄຳເຊີນຂອງລັດຖະບານຍີ່ປຸ່ນ, ຄະນະຜູ້ແທນຂັ້ນສູງພັກ ປປ ລາວ, ນຳໂດຍ ທ່ານ ຈັນສີ ໂພສີຄຳ, ກຳມະການກົມການເມືອງ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ຢ້ຽມຢາມປະເທດ ຍີ່ປຸ່ນ ແຕ່ວັນທີ 11-15 ມີນາ 2019.
ໄລຍະຢູ່ຢ້ຽມຢາມຍີ່ປຸ່ນ, ຄະນະໄດ້ພົບປະເຮັດວຽກກັບບັນດາພາກສ່ວນກ່ຽວຂ້ອງຂອງຍີ່ປຸ່ນ ທັງຢູ່ນະຄອນຫຼວງໂຕກຽວ ແລະ ແຂວງ ວາກາຢາມະ ດັ່ງນີ້: ພົບປະກັບ ທ່ານ ໂຕຊິຮິໂຣະ ນີໄກ, ເລຂາທິການພັກເສລີປະຊາທິປະໄຕ; ພົບປະກັບ ທ່ານ ເຄນທາໂຣ ໂຊໂນອູຣະ, ທີ່ປຶກສາພິເສດຂອງນາຍົກ ຊິນໂຊ ອາເບະ, ພົບປະກັບ ທ່ານ ນາງ ໂຕຊິໂກ ອາເບະ, ຮອງລັດຖະມົນຕີຕ່າງປະເທດຍີ່ປຸ່ນ; ພົບປະກັບການນຳຂອງສະຖາບັນຄົ້ນຄ້ວາຄົ້ນນະໂຍບາຍຂອງ ຍີ່ປຸ່ນ (GRIPS); ພົບປະກັບການນຳຂອງອົງການໄຈກາ, ບໍລິສັດ Jalux, ກຸ່ມບໍລິສັດໂຕໂຍຕາ ຊູໂຊະ ທີ່ພວມມີການລົງທຶນຢູ່ ສປປ ລາວ; ພົບປະກັບ ທ່ານ ທາເຄໂອ ກາວາມູຣະ, ປະທານສະມາຄົມມິດຕະພາບ ຍີ່ປຸ່ນ - ລາວ ສາຍລັດຖະສະພາ.

   ໃນຕອນເຊົ້າຂອງວັນທີ 21 ມັງກອນ 2021, ຄະນະນໍາ ຄະນະພົວພັນຕ່າງປະເທດສູນກາງ ພັກ ນໍຳໂດຍ ສະຫາຍ ສົມພອນ ສີຈະເລີນ, ຮອງຫົວໜ້າ ຄະນະພົວພັນຕ່າງປະເທດສູນກາງພັກ ພ້ອມດ້ວຍ 3 ອົງການຈັດຕັ້ງມະຫາຊົນ ຂອງ ຄະນະພົວພັນຕ່າງປະເທດສູນກາງພັກ ໄດ້ເຂົ້າຢ້ຽມຊົມອະນຸສອນ ສະຖານຄຸກກັກຂັງຜູ້ນຳພັກ-ແນວລາວຮັກຊາດ ແລະ ຫໍມູນເຊື້ອຂອງສູນກາງແນວລາວສ້າງຊາດ ເພື່ອເປັນການສ້າງຂະບວນການຊົມເຊີຍກອງ ປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ແລະ ຂຳ່ນັບຮັບຕ້ອນວັນສຳຄັນຕ່າງໆຂອງພັກ ຂອງຊາດ, ໂດຍສະເພາະ ວັນສ້າງຕັ້ງກອງທັບ ປະຊາຊົນລາວ ຄົບຮອບ 72 ປີ ແລະ ວັນສ້າງຕັ້ງພັກ ປະຊາຊົນ ປະຕິວັດລາວ ຄົບຮອບ 66 ປີ, ທັງເປັນການສ້າງຂະບວນການ ເພື່ອຂ່ຳນັບຮັບຕ້ອນກອງປະຊຸມໃຫຍ່ ຄັ້ງທີ II ຂອງອົງຄະນະພັກ ຄະນະພົວພັນຕ່າງປະເທດສູນກາງພັກ ທີ່ຈະມາເຖິງ.
   ການຢ້ຽມຊົມອະນຸສອນສະຖານຄຸກກັກຂັງຜູ້ນຳພັກ-ແນວລາວຮັກຊາດ ແລະ ຫໍມູນເຊື້ອຂອງສູນກາງແນວລາວສ້າງຊາດ ຂອງຄະນະໃນຄັ້ງນີ້ ແມ່ນ ເພື່ອເຮັດໃຫ້ 3 ອົງການຈັດຕັ້ງມະຫາຊົນ ກໍຄືພະນັກງານພາຍໃນຄະນະພົວພັນຕ່າງປະເທດສູນກາງພັກ ຮັບຮູ້ເຂົ້າໃຈຢ່າງເລິກເຊິ່ງເຖິງປະຫວັດຄວາມ ເປັນມາ ແລະ ວິລະກຳອັນລ້ຳເລີດຂອງພັກ, ກອງທັບ ແລະ ປະຊາຊົນລາວບັນດາເຜົ່າ ໃນພາລະກິດຕໍ່ສູ້ກູ້ຊາດໃນເມື່ອກ່ອນ ແລະ ພ້ອມທັງສຶກສາຮ່ຳ ຮຽນເອົາເປັນແບບຢ່າງໃນການເຝິກ ຝົນຫຼໍ່ຫຼອມຕົນເອງເພື່ອປະກອບສ່ວນສ້າງສາ ແລະ ພັດທະນາປະເທດຊາດ ໃຫ້ຈະເລີນກ້າວໜ້າຍິ່ງໆຂຶ້ນໄປ.

ວັນ​ທີ 29 ມິ​ຖຸ​ນາ 2020, ທີ່ສຳນັກງານ ຄະນະພົວພັນຕ່າງປະເທດສູນກາງພັກ ໄດ້​ມີ​ພິ​ທີ​ປະ​ກາດ​ນາມ​ມະ​ຍົດ​ ຄະ​ນະ​ຊາວ​ໜຸ່ມ ປະ​ຊາ​ຊົນ ​ປະ​ຕິ​ວັດ​ລາວ 4 ບຸກ ໃຫ້​ແກ່ ຄະ​ນະ​ຊາວ​ໜຸ່ມ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາ​ງ​ພັກ.ໃຫ້​ກຽດ​ເຂົ້າ​ຮ່ວມ​ໃນ​ພິ​ທີ​ຄັ້ງນີ້ມີສະ​ຫາຍ ນາງ ວິ​ລະ​ວອນ ພັນ​ທະ​ວົງ, ຮອງເລຂາຄະນະພັກ, ຮອງ​ເລ​ຂາ​ຄະ​ນະ​ບໍ​ລິ​ຫານ​ງານ​, ປະທານກວດກາສູນ​ກາງ​ຊາວ​ໜຸ່ມ ປະ​ຊາ​ຊົນ ປະ​ຕິ​ວັດ​ລາວ, ສະຫາຍ ສົມດີ ບຸນຄຸ້ມ, ກຳມະການຄະນະພັກ, ຮອງຫົວໜ້າຄະນະພົວພັນຕ່າງປະເທດສູນກາງພັກ, ປະທານກວດກາ. ນອກນັ້ນ, ​ຍັງ​ມີບັນ​ດາ​ສະ​ຫາຍ​ເລ​ຂາ​ໜ່ວ​ຍ​ພັກ, ອົງ​ການ​ຈັດ​ຕັ້ງ​ມະ​ຫາ​ຊົນ, ຄະ​ນະ​ບໍ​ລິ​ຫານ​ງານ​ຊາວ​ໜຸ່ມ, ຄະນະໜ່ວຍ​ຊາວ​ໜຸ່ມ ແລະ ສະ​ມາ​ຊິກ​ຊາວ​ໜຸ່ມ​ ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ​ແລະ ພາກ​ສ່ວ​ນ​ກ່ຽວ​ຂ້ອງ ​ຂອງ​ສູນ​ກາງ​ຊາວ​ໜຸ່ມ ​ປະ​ຊາ​ຊົນ ​ປະ​ຕິ​ວັດ​ລາວ ເຂົ້າ​ຮ່ວມ​ຢ່າງ​ພ້ອມ​ພຽງ.

​ໃນພິທີດັ່ງກ່າວ, ສະຫາຍ ຄຳເຟື້ອງ ພັນທະໄຊ, ເລຂາຄະນະບໍລິຫານງານຊາວໜຸ່ມ ຄະນະ ພົວພັນຕ່າງປະເທດສູນກາງພັກ ໄດ້ຂື້ນຜ່ານບົດສະຫຼຸບການເຄື່ອນໄຫວຈັດຕັ້ງປະຕິບັດຂໍ້ແຂ່ງຂັນ 4 ບຸກ ປະຈຳປີ 2019 ເຊິ່ງສາມາດປະເມີນທັງ 4 ດ້ານ ຄື: ບຸກດ້ານແນວຄິດ, ບຸກດ້ານຝຶກຝົນຫຼໍ່ຫຼອມ ຮໍ່າຮຽນ, ບຸກດ້ານວຽກງານການຈັດຕັ້ງ ແລະ ບຸກດ້ານວິຊາຊີບ-ສ້າງວຽກເຮັດງານທຳ ໄດ້ສະເລ່ຍ 91.51%. ຈາກການປະເມີນຜົນການຈັດຕັ້ງປະຕິບັດຂໍ້ແຂ່ງຂັນດັ່ງກ່າວ ເຫັນວ່າຄົບມາດຖານເງື່ອນ ໄຂທີ່ ຄະນະຊາວໜຸ່ມ ປະຊາຊົນ ປະຕິວັດລາວ ວາງອອກ. ຜົນສຳເລັດດັ່ງກ່າວ ຈະເປັນ​ພື້ນ​ຖານ​ສຳ​ຄັນ​ໃຫ້​ແກ່​ການ​ສືບ​ຕໍ່​ຮັກ​ສາ​ນາມ​ມະຍົດຊາວໜຸ່ມ 4 ບຸກ ແລະ ປະຕິບັດຄາດໝາຍສູ້ຊົນ​ຍາດ​ເອົາ​ທຸງ​ໄຊນຳໜ້າຂະບວນການ 4 ບຸກ​ ໃນ​ຊຸມ​ປີ​ຕໍ່​ໜ້າ.

         ການຈັດພິທີ​ປະ​ກາດ​ຮັບ​ຮອງ​ຄະ​ນະ​ຊາວ​ໜຸ່ມ 4 ບຸກ​ ໃນ​ຄັ້ງນີ້​ ຖື​ເປັນ​ເຫດ​ການ​ສຳ​ຄັນປະຫວັດ ສາດ ຂອງຄະ​ນະ​ຊາວ​ໜຸ່ມ​ ຄະ​ນະ​ພົວ​ພັນ​ຕ່າງ​ປະ​ເທ​ດ​ສູນ​ກາງ​ພັກ ເພື່ອເປັນລະນຶກວັນຮັບຮອງເອົາກົດລະບຽບສະບັບທຳອິດຂອງ ຄະນະພົວພັນຕ່າງປະເທດສູນກາງພັກ ເຊິ່ງຖືເປັນວັນສ້າງຕັ້ງ ຄະນະພົວພັນ ຕ່າງປະເທດສູນກາງພັກ ຄົບຮອບ 37 ປີ (29 ມິຖຸນາ 1983 – 29 ມິຖຸນາ 2020) ທັງເປັນການສ້າງຂະບວນການຂໍ່ານັບຮັບຕ້ອນ ກອງປະຊຸມໃຫຍ່ຊາວໜຸ່ມ ຄະນະພົວພັນຕ່າງ ປະເທດ ສູນກາງພັກ ຄັ້ງທີ I ແລະ ກອງປະຊຸມໃຫຍ່ອົງຄະນະພັກ ຄະນະພົວພັນຕ່າງປະເທດສູນກາງພັກ ຄັ້ງທີ II ທີ່ຈະຈັດຂື້ນໃນຕໍ່ໜ້ານີ້.