ຊົມ​ເຊີຍ​ຜົນສຳເລັດ ກອງ​ປະ​ຊຸມ​ໃຫຍ່​​ອົງ​ຄະ​ນະ​ພັກ ຄະ​ນະ​ພົວ​ພັນ​ຕ່າງ​ປະ​ເທດ​ສ​ູນ​ກາງ​ພັກ ຄັ້ງທີ I ຢ່າງ​ສຸດ​ໃຈ. " ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເພີ່ມທະວີມະຫາສາມັກຄີທົ່ວປວງຊົນທັງຊາດ, ຢຶດໝັ້ນແນວທາງປ່ຽນແປງໃໝ່ຮອບດ້ານ ແລະ ມີຫຼັກການ, ປົກປັກຮັກສາ ແລະ ພັດທະນາປະເທດຊາດ ຕາມທິດຢືນຍົງ ສູ່ຈຸດມຸ້ງໝາຍສັງຄົມນິຍົມຢ່າງແທ້ຈິງ ".

28 08 2020

 

       ໂດຍປະຕິບັດຕາມກົນໄກພົບປະ ລະຫວ່າງ ສອງ ຄະນະພົວພັນຕ່າງປະເທດສູນກາງພັກ ປະຊາ ຊົນ ປະຕິວັດລາວ ແລະ ພັກກອມມູນິດ ຫວຽດນາມ, ໃນຕອນແລງວັນທີ 28 ສິງຫາ 2020, ສະຫາຍ ນາງ ສູນທອນ ໄຊຍະຈັກ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ປະຊາຊົນ ປະຕິວັດລາວ ໄດ້ມີການພົບປະທາງໄກກັບ ສະຫາຍ ຮວ່າງ ບິ່ງ ກວັນ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກກອມມູນິດ ຫວຽດນາມ.

      ໃນການພົບປະຄັ້ງນີ້, ສະຫາຍ ນາງ ສູນທອນ ໄຊຍະຈັກ ໄດ້ສະແດງຄວາມປິຕິຍິນດີທີ່ໄດ້ມີໂອກາດພົບປະ ກັບ ສະຫາຍ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດ ຫວຽດນາມ, ສະຫາຍ ໄດ້ແຈ້ງໃຫ້ກັບຝ່າຍຫວຽດນາມ ຊາບກ່ຽວກັບສະພາບພົ້ນເດັ່ນໃນ ສປປ ລາວ ໃນປີ 2020, ຕີລາຄາການພົວພັນຮ່ວມມື ລະຫວ່າງ ລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງ ສອງ ຄະ ນະພົວພັນຕ່າງປະເທດສູນກາງພັກ ຂອງ ສອງພັກ, ທັງໄດ້ປຶກສາຫາລືກັບຄູ່ຮ່ວມຕໍາແໜ່ງກ່ຽວກັບທິດທາງການຮ່ວມມືສອງຝ່າຍໃນຕໍ່ໜ້າ; ສະຫາຍ ຍັງໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ບັນດາຜົນສໍາເລັດໃນການພັດທະນາເສດຖະກິດ-ສັງຄົມ ຂອງ ຫວຽດນາມ ໃນປີ 2020, ພິເສດ ແມ່ນຜົນສໍາເລັດໃນການເປັນປະທານກອງປະຊຸມສຸດຍອດຄັ້ງທີ 36 ຂອງອາຊຽນ, ຜົນສໍາເລັດໃນການສະກັດກັ້ນ, ຄວບຄຸມການແຜ່ລະບາດຂອງພະຍາດໂກວິດ-19 ຢູ່ ສສ ຫວຽດນາມ ໃນປະຈຸບັນ.

       ສະຫາຍ ຮວ່າງ ບິ່ງ ກວັນ ໄດ້ສະແດງຄວາມດີໃຈທີ່ໄດ້ມີໂອກາດພົບປະທາງໄກກັບຝ່າຍລາວ, ໄດ້ແຈ້ງໃຫ້ຊາບກ່ຽວກັບສະພາບພົ້ນເດັ່ນຂອງ ສສ ຫວຽດນາມ, ຕີລາຄາຜົນສໍາເລັດຂອງການພັດທະ ນາເສດຖະກິດ-ສັງຄົມ ຢູ່ ລາວ ໃນປີ 2020 ກໍ່ຄືຕີລາຄາຜົນການຮ່ວມມືສອງຝ່າຍ, ມີຄວາມເປັນເອກະພາບຕໍ່ທິດທາງການຮ່ວມມື ລະຫວ່າງ ສອງ ຄະນະພົວພັນຕ່າງປະເທດສູນກາງພັກ ໃນຊຸມປີຕໍ່ໜ້າ ເພື່ອສືບຕໍ່ປະກອບສ່ວນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຫວຽດນາມ-ລາວ.

        ນອກນັ້ນ, ສອງຝ່າຍ ໄດ້ແລກປ່ຽນທັດສະນະກ່ຽວກັບສະພາບການພາກພື້ນ ແລະ ສາກົນ ທີ່ພວມສືບຕໍ່ຜັນແປໄປຢ່າງສັບສົນ, ວ່ອງໄວໃນປະຈຸບັນ.

       ເນື່ອງໃນໂອກາດວັນຊາດ ສສ ຫວຽດນາມ ຄົບຮອບ 75 ປີ, ສະຫາຍ ນາງ ສູນທອນ ໄຊຍະຈັກ ຍັງໄດ້ອວຍພອນ ສະຫາຍ ຮວ່າງ ບິ່ງກວັນ ພ້ອມຄະນະນໍາ ແລະ ພະນັກງານທົ່ວ ຄະນະພົວພັນຕ່າງປະເທດສູນກາງພັກກອມມູນິດ ຫວຽດນາມ ຈົ່ງສືບຕໍ່ຍາດໄດ້ຜົນສໍາເລັດໃໝ່, ໃຫຍ່ຫຼວງກວ່າເກົ່າໃນໜ້າທີ່ການງານຂອງຕົນ, ສືບຕໍ່ປະກອບສ່ວນເຂົ້າໃນວຽກງານການຕ່າງປະເທດ ຂອງ ພັກກອມມູນິດ ຫວຽດນາມ ໃຫ້ນັບມື້ນັບມີປະສິດທິຜົນ.

party x

ສະຖິຕິຜູ້ເຂົ້າຊົມ

285576
Today400
Yesterday901
This_Week4636
This_Month8003
All_Days285576