ພິທີມອບ - ຮັບ ໜ້າທີ່ຫົວໜ້າຄະນະພົວພັນຕ່າງປະເທດສູນກາງພັກ

8April21

ພິທີມອບ-ຮັບໜ້າທີ່ ຫົວໜ້າຄະນະພົວພັນຕ່າງປະເທດສູນກາງພັກ ຜູ້ເກົ່າ ແລະ ຜູ້ໃໝ່ ລະຫວ່າງ ສະຫາຍ ປອ ນາງ ສູນທອນ ໄຊຍະຈັກ, ເລຂາທິການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ ຜູ້ເກົ່າ ແລະ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນ ຕ່າງປະເທດສູນກາງພັກ ຜູ້ໃໝ່ ໄດ້ຈັດຂື້ນໃນວັນທີ 5 ເມສາ 2021 ທີ່ ຄະນະພົວພັນຕ່າງປະເທດສູນກາງພັກ, ໂດຍພາຍໃຕ້ການໃຫ້ກຽດເປັນປະທານ ຂອງ ສະຫາຍ ປອ. ຄຳ​ພັນ ພົມ​ມະ​ທັດ, ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ເລ​ຂາ​ທິ​ການ​ສູນ​ກາງ​ພັກ, ປະ​ທານ​ຄະ​ນະ​ກວດ​ກາ​ສູນ​ກາງ​ພັກ, ປະ​ທານອົງ​ການກວດ​ກາ​ແຫ່ງ​ລັດ, ມີບັນດາສະຫາຍຄະ​ນະ​ພັກ, ການນໍາ ແລະ ສະມາຊິກພັກ, ພະນັກງານ ຄະນະພົວພັນຕ່າງປະເທດສູນກາງພັກ ເຂ້ົາຮ່ວມຢ່າງ​ພ້ອມ​ພຽງ.

ການມອບ-ຮັບໜ້າທີ່ຄັ້ງນີ້ ແມ່ນປະຕິບັດຕາມຄຳສັ່ງ ຂອງກົມການເມືອງສູນກາງພັກ ວ່າດ້ວຍການຍົກຍ້າຍ ສະຫາຍ ປອ. ນາງ ສູນທອນ ໄຊຍະຈັກ, ເລຂາທິການສູນກາງພັກ ໄປຮັບໜ້າທີ່ໃໝ່ຢູ່ສະພາແຫ່ງຊາດ ສະ​ບັບເລກ​ທີ 08/ກມ​ສ​ພ, ລົງ​ວັນ​ທີ 24/3/2021 ແລະ ຕາມ​ມະ​ຕິຕົກລົງແຕ່ງຕັ້ງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ ເປັນເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ ສະ​ບັບ​ເລກ​ທີ 21/ກມ​ສ​ພ, ລົງ​ວັນ​ທີ 24/03/2021.

ໃນພິທີ, ສະຫາຍ ປອ. ນາງ ສູນທອນ ໄຊຍະຈັກ, ເລຂາທິການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກ ຜູ້ເກົ່າ ໄດ້ກ່າວລາຍງານກ່ຽວ​ກັບ​ວຽກ​ງານ​ການ​ເຄື່ອນ​ໄຫວໂດຍຫຍໍ້ ຂອງຄະນະພົວພັນຕ່າງປະເທດສູນກາງພັກ ໃນ​ໄລ​ຍະ 5 ປີ​ຜ່ານ​ມາ ນັບແຕ່ປີ 2015 ເປັນຕົ້ນມາ ພາຍຫຼັງໄດ້ມີການປັບປຸງຄັ້ງສຳຄັນ ໂດຍໄດ້ແຍກອອກຈາກ ອົງຄະນະພັກກະຊວງການຕ່າງ ປະເທດ ແລະ ຄະນະພົວພັນຕ່າງປະເທດສູນກາງພັກ ມາເປັນອົງຄະ​ນະ​ພັກເອກະລາດເປັນຄັ້ງທຳອິດ, ຊຶ່ງສາ ມາດຍາດໄດ້ຜົນສຳເລັດສຳຄັນຫຼາຍດ້ານ ໃນການປະຕິບັດໜ້າທີ່ເປັນເສນາໃຫ້ແກ່ສູນກາງພັກໃນວຽກງານຕ່າງປະເທດຂອງ​ພັກ ແລະ ການ​ທູດ​ປະ​ຊາ​ຊົນ ທັງ​ໃນ​ກອບ​ສອງ​ຝ່າຍ ແລະ ຫຼາຍ​ຝ່າຍ, ປະ​ກອບ​ສ່ວນ​ຢ່າງ​ຕັ້ງ​ໜ້າ​ເຂົ້າ​ໃນ​ພາ​ລະ​ກິດປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ປະ​ເທດ​ຊາດ.

ຫຼັງ​ຈາກນັ້ນ, ສະ​ຫາຍ ທອງ​ສະ​ຫວັນ ພົມ​ວິ​ຫານ, ກຳ​ມະ​ການ​ສູນ​ກາງ​ພັກ, ຫົວ​ໜ້າ​ຄະ​ນະ​ພົວ​ພັນ​ຕ່າງ​ປະ​ເທດ​ສູນ​ກາງ​ພັກ ໄດ້​ຂື້ນ​ກ່າວ​ຮັບ​ໜ້າ​ທີ່ ໂດຍ​ໄດ້​ຕີ​ລາ​ຄາ​ຜົນ​ສຳ​ເລັດ​ຂອງ ຄ​ຕ​ພ ໃນ​ໄລ​ຍະ​ຜ່ານ​ມາ ພາຍ​ໃຕ້​ການ​ຊີ້​ນຳນຳ​ພາ​ຂອງ​ສະ​ຫາຍ​ຫົວ​ໜ້າ ຄ​ຕ​ພ ຜູ້​ເກົ່າ ແລະ ໄດ້​ໃຫ້​ຄຳ​ໝາຍ​ໝັ້ນ​ຈະ​ພ້ອມ​ກັບ​ໝູ່​ຄະ​ນະ​ ສືບ​ຕໍ່​ປະ​ຕິ​ບັດ​ໜ້າ​ທີ່ເປັນ​ເສ​ນາ​ທິ​ການ​ໃຫ້​ແກ່​ສູນກ​າງ​ພັກ​ໃນ​ວຽກ​ງານ​ຕ່າງ​ປະ​ເທດ ເພື່ອ​ປະ​ກອບ​ສ່ວນ​ເຂົ້າ​ໃນ​ການ​ປະ​ຕິ​ບັດ​ແນວ​ທາງ​ຕ່າງ​ປະ​ເທດ​ຂອງ​ພັກ ໃຫ້​ມີ​ປະ​ສິດ​ທິ​ຜົນ​ຍິ່ງ​ຂື້ນ.

        ໃນພິທີດັ່ງກ່າວ, ສະຫາຍ ​ປອ. ຄຳ​ພັນ ພົມ​ມະ​ທັດ, ກຳ​ມະ​ການ​ກົມ​ການ​ເມືອງ​ສູນ​ກາງ​ພັກ, ເລ​ຂາ​ທິ​ການ​ສູນ​ກາງ​ພັກ, ປະ​ທານ​ຄະ​ນະ​ກວດ​ກາ​ສູນ​ກາງ​ພັກ, ປະ​ທານອົງ​ການກວດ​ກາ​ແຫ່ງ​ລັດ ໄດ້ໃຫ້ກຽດໂອ້ລົມ ໂດຍຕາງໜ້າໃຫ້ກົມການເມືອງ ແລະ ຄະນະເລຂາທິການສູນກາງພັກ ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານອັນພົ້ນເດັ່ນທີ່ ຄ​ຕ​ພ ຍາດ​ມາ​ໄດ້ ແລະ ໄດ້ສະເໜີໃຫ້​ສືບ​ຕໍ່​ປົກ​ປັກ​ຮັກສາ ​ແລະ ເສີມຂະຫຍາຍມູນ​ເຊື້ອຄວາມ​ສາມັກຄີເປັນ​ເອກະ​ພາບ​ພາຍ​ໃນຄະນະ​​ພັກ​ ກໍ່​ຄື​ຄະນະ​ນຳ​ທຸກ​ຂັ້ນ ​ເພື່ອ​​​ປະຕິບັດພາລະບົດບາດ, ສິດໜ້າທີ່ ຄວາມຮັບຜິດຊອບຂອງຕົນ, ເປັນ​ເຈົ້າ​ການຈັດ​ຕັ້ງ​ຜັນ​ຂະຫຍາຍ​ມະຕິ​ກອງ​ປະຊຸມ​ໃຫຍ່​ຄັ້ງ​ທີ XI ຂອງ​ພັກ ​ແລະ ​ແຜນ​ພັດທະນາ​ເສດຖະກິດ​-ສັງຄົມ 5 ປີ​ແຫ່ງ​ລັດ ຄັ້ງ​ທີ 9, ຕິດ​ພັນ​ກັບ​ການຈັດ​ຕັ້ງ​ປະຕິບັດ​ວຽກ​ງານ​ 3 ສ້າງ ໃຫ້ໄດ້ຮັບຜົນສໍາເລັດດີ; ສືບ​ຕໍ່​ເປັນເຈົ້າ​ການ​ຍູ້​ແຮງ​ການ​ເຄື່ອນ​ໄຫວ​ການ​ທູດ ລະດັບສຸດຍອດຂອງພັກ ແລະ ການທູດ​ປະ​ຊາ​ຊົນ ໂດຍ​​ຖື​ເປັນ​ວຽກ​ງານ​ປາຍ​ແຫຼມ ​ໃນ​ການ​ເຄື່ອນ​ໄຫວວ​ຽກ​ງານ​ການ​ຕ່າງ​ປະ​ເທດຂອງພັກໃນໄລຍະໃໝ່; ສູ້ຊົນສ້າງຕັ້ງສາຍພົວພັນກັບພັກການເມືອງຕ່າງປະເທດ ນັບມື້ຫຼາຍຂຶ້ນ ແລະ ເຊື້ອໝັ້ນວ່າ ສະຫາຍຫົວໜ້າຄະນະພົວພັນຕ່າງປະເທດສູນກາງພັກ ​ຜູ້​ໃໝ່ ທີ່ເຄີຍໄດ້ຮ່ວມວຽກງານຢູ່ ຄະນະພົວພັນຕ່າງປະເທດສູນກາງພັກມາກ່ອນ ຈະ​ພ້ອມ​ກັບ​ໝູ່​ຄະນະ ​ຍົກ​ສູງ​ຄວາມ​ຮັບຜິດຊອບ, ​ເປັນ​ຫຼັກ​ແຫຼ່ງ, ​ເປັນ​ຄັນ​ທຸງ​ເຕົ້າ​ໂຮມ​ຄວາມ​ສາມັກຄີ​ເປັນ​ເອກະ​ພາບຢູ່​ພາຍ​ໃນ ​ເພື່ອ​ເຮັດ​ສຳ​ເລັດ​ໜ້າ​ທີ່ ​ແລະ ນຳພາ​ຄະນະພົວພັນຕ່າງປະເທດສູນກາງພັກ​ສືບ​ຕໍ່ກ້າວ​ຂຶ້ນ​ຢ່າໜັກ​ແໜ້ນ​ ຕາມ​ທິດ​ທີ່​ກອງ​ປະຊຸມ​ໃຫຍ່ຄັ້ງ​ທີ XI  ຂອງ​ພັກວາງ​ອອກ.