ຊົມ​ເຊີຍ​ຜົນສຳເລັດ ກອງ​ປະ​ຊຸມ​ໃຫຍ່​​ອົງ​ຄະ​ນະ​ພັກ ຄະ​ນະ​ພົວ​ພັນ​ຕ່າງ​ປະ​ເທດ​ສ​ູນ​ກາງ​ພັກ ຄັ້ງທີ I ຢ່າງ​ສຸດ​ໃຈ. " ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເພີ່ມທະວີມະຫາສາມັກຄີທົ່ວປວງຊົນທັງຊາດ, ຢຶດໝັ້ນແນວທາງປ່ຽນແປງໃໝ່ຮອບດ້ານ ແລະ ມີຫຼັກການ, ປົກປັກຮັກສາ ແລະ ພັດທະນາປະເທດຊາດ ຕາມທິດຢືນຍົງ ສູ່ຈຸດມຸ້ງໝາຍສັງຄົມນິຍົມຢ່າງແທ້ຈິງ ".
×

Notice

There is no category chosen or category doesn't contain any items

2020 10 20

21 Oct 2020

 

          ໃນຕອນເຊົ້າຂອງວັນທີ 20 ຕຸລາ 2020 ຊຶ່ງແມ່ນວັນວັດທະນະທຳແຫ່ງຊາດກູບາ, ຄະນະສະມາຄົມມິດຕະພາບ ລາວ-ກູບາ ໄດ້ຈັດພິທີຢ່າງເປັນທາງການຢູ່ເຂດວິລະຊົນບ້ານດົງບັງ ເມືອງໄຊທານີ ນະຄອນຫຼວງວຽງຈັນ ເພື່ອປະດິດສະຖານຮູບຫຼໍ່ເຄິ່ງຄີງຂອງ ທ່ານ ໂຮເຊ ມາກຕີ, ວິລະຊົນແຫ່ງຊາດກູບາ ພ້ອມທັງປະກາດເອົາໂຮງຮຽນມັດທະຍົມສົມບູນດົງບັງດັ່ງກ່າວ ເປັນໂຮງຮຽນມັດທະຍົມສົມບູນ ດົງບັງ ມິດຕະພາບ ລາວ-ກູບາ ທັງຮັບເປັນສາຂາ ແລະ ສະມາຊິກລວມໝູ່ຂອງສະມາຄົມມິດຕະພາບ ລາວ-ກູບາ ເຊິ່ງພິທີທາງສາດສະໜາຕາມຮີດຄອງປະເພດນີ ກ່ຽວກັບ ການຍົກຮູບຫຼໍ່ເຄິ່ງຄີງຂື້ນແທ່ນ ແລະ ປະດິດສະຖານແມ່ນໄດ້ຈັດຂື້ນໃນວັນທີ 9 ຕຸລາ 2020 ກ່ອນໜ້ານີ້. 

  ໃຫ້ກຽດເຂົ້າຮ່ວມໃນພິທີດັ່ງກ່າວມີ: ທ່ານ ປອ ນາງ ສູນທອນ ໄຊຍະຈັກ,​ ກຳມະການສູນກາງພັກຫົວໜ້າຄະນະພົວພັນຕ່າງປະເທດສູນກາງພັກ; ທ່ານ ສຈ.ປອ ຈະເລີນ ເຍ່ຍປາວເຮີ, ກຳມະການສູນກາງພັກ, ລັດຖະມົນຕີປະຈຳສຳນັກງານນາຍົກ, ປະທານສະມາຄົມມິດຕະພາບ ລາວ-ກູບາ ແລະ ທ່ານ ປາໂບລ ອັງໂຕນີໂອ ໂລຕລີເກັສ ວິດານ  (Pablo Antonio Rodriguez Vidal), ເອກອັກຄະລັດຖະທູດແຫ່ງ ສ.ກູບາ ປະຈໍາ  ສປປ ລາວ. ນອກຈາກນັ້ນຍັງມີບັນດາ ສະຫາຍ ຮອງເຈົ້າຄອງນະຄອນຫຼວງວຽງຈັນ, ຮອງລັດຖະມົນຕີ, ອຳນາດການປົກຄອງເມືອງໄຊທານີ, ອາດິດເອກອັກຄະລັດຖະທູດລາວ ປະຈຳກູບາ, ຫົວໜ້າກົມ, ຮອງກົມ, ຫົວໜ້າພະແນກ ແລະ ຮອງພະແນກ ຈາກພາກສວ່ນກ່ຽວຂ້ອງ, ອາດິດນັກສຶກສາຈົບຈາກກູບາ, ນັກສຶກສາພາກພາສາເອັດປາຍໂຍນ ຈາກ ມະຫາວິທະຍາໄລແຫ່ງຊາດ, ຄູອາຈານ ແລະ ນັກຮຽນ ຈາກໂຮງຮຽນ ມສ.ດົງບັງ ມິດຕະພາບ ລາວ-ກູບາ ແລະ ອຳນາດການປົກຄອງບ້ານດົງບັງ, ເມືອງໄຊທານີ, ນະຄອນຫຼວງວຽງຈັນ ເຂົ້າຮ່ວມຢ່າງພ້ອມພຽງ.

         ພາຍຫລັງທີ່ໄດ້ຮັບຟັງຄວາມເປັນມາຂອງໂຮງຮຽນ, ການຜ່ານຂໍ້ຕົກລົງວ່າດ້ວຍການປ່ຽນຊື່ໂຮງຮຽນ ແລະ ການຮັບຮອງເອົາໂຮງຮຽນເປັນສາຂາ ແລະ ສະມາຊິກລວມຫມູ່ຂອງສະມາຄົມມິດຕິພາບລາວ-ກູບາ ແລ້ວ, ທ່ານ ສຈ.ປອ ຈະເລີນ ເຍຍປາວເຮີ, ກຳມະການສູນກາງພັກ, ລັດຖະມົນຕີປະຈຳສຳນັກງານນາຍົກລັດຖະມົນຕີ,ປະທານສະມາຄົມມິດຕະພາບ ລາວ-ກູບາ ແລະ ທ່ານ ປາໂບລ ອັງໂຕນີໂອໄດ້ຜັດປ່ຽນກັນຂຶ້ນມີຄຳເຫັນໂດຍທ່ານທັງສອງໄດ້ຊີ້ໃຫ້ເຫັນເຖິງຄວາມຫມາຍສຳຄັນ ຂອງການຕັ້ງຊື່ໂຮງຮຽນມິດຕະພາບ ລາວ-ກູບາ ແລະ ການປະດິດສະຖານຮູບຫຼໍ່ເຄິ່ງຄີງຂອງ ທ່ານ ໂຮ່ເຊ ມາກຕີ, ວີລະຊົນແຫ່ງຊາດກູບາ ເຊິ່ງເປັນການປະກອບເຂົ້າໃນການເສີມຂະຫຍາຍສາຍພົວພັນມິດຕະພາບ ຖານອ້າຍນອ້ງທີ່ມີມູນເຊື້ອລະຫວ່າງປະຊາຊົນສອງຊາດລາວ ແລະ ກູບາ ໄປສູ່ບາດກ້າວໃຫມ່. ຫລັງຈາກນັ້ນ, ທ່ານ ຫົວຫນ້າຄະນະພົວພັນຕ່າງປະເທດສູນກາງພັກ, ທ່ານ ປະທານສະມາຄົມມິດຕະພາບ ລາວ-ກູບາ ແລະ ທ່ານເອກອັກຄະລັດຖະທູດກູບາ ໄດ້ວາງກະຕ່າດອກໄມ້ຢູ່ຕໍ່ຫນ້າຮູບຫລໍ່ ຂອງ ທ່ານ ໂຮ່ເຊ ມາກຕີ ແລະ ຕັດແຖບຜ້າເປີດປ້າຍໂຮງຮຽນ ມສ. ດົງບັງ ມິດຕະພາບລາວ-ກູບາ ຢ່າງເປັນທາງການ. ໃນຕອນທ້າຍ ໄດ້ມີການມອບຄອມພິວເຕີຈຳນວນ 3 ເຄື່ອງໃຫ້ແກ່ໂຮງຮຽນ ໂດຍ ທ່ານ ປະທານສະມາຄົມມິດຕະພາບ ລາວ-ກູບາ ແລະ ທ່ານ ທູດກູບາ ປະຈຳ ສປປ ລາວ.

         ການກຳນົດເອົາໂຮງຮຽນ ມສ. ດົງບັງ ເປັນໂຮງຮຽນມິດຕະພາບ ລາວ-ກູບາ ນີ້ ກໍເພື່ອເປັນສັນຍາລັກແຫ່ງການພົວພັນມິດຕະພາບ ແລະ ການຮ່ວມມື ທີ່ມີມູນເຊື້ອອັນດີງາມ ລະຫວ່າງ ສອງພັກ, ສອງລັດ ກໍຄືປະຊາຊົນສອງຊາດ, ທັງເປັນສະຖານທີ່ໃນການສຶກສາອົບຮົມ ແລະ ເຜີຍແຜ່ກ່ຽວກັບປະຫວັດສາດແຫ່ງການຕໍ່ສູ້ປະຕິວັດຂອງປະຊາຊົນກູບາ, ເຜີຍແຜ່ກ່ຽວກັບຮີດຄອງປະເພນີ ແລະ ວັດທະນະທຳ ຂອງ ກູບາ ຢູ່ລາວເປັນໂອກາດຮຽນຮູ້ ກ່ຽວກັບ ຊີວິດ, ແນວຄິດ ແລະ ການເຄື່ອນໄຫວປະຕິວັດເພື່ອເອກະລາດແຫ່ງຊາດ ຂອງ ທ່ານ ໂຮ່ເຊ ມາກຕີ, ວິລະຊົນແຫ່ງຊາດກູບາ ແລະ ທັງຈະເປັນສະຖານທີ່ໃຫ້ສະມາຄົມມິດຕະພາບ ລາວ-ກູບາ ໄດ້ສ້າງກິດຈະກຳຕ່າງໆ ເນື່ອງໃນໂອກາດວັນສຳຄັນຕ່າງໆຂອງສອງຊາດ.

  ກ່ອນໜ້ານີ້, ໃນວັນທີ 1 ກັນຍາ 1985 ທີ່ຜ່ານມາ ສະຖາບັນກູບາ ເພື່ອມິດຕະພາບກັບນາໆຊາດກໍ່ໄດ້ກຳນົດເອົາໂຮງຮຽນມັດທະຍົມແຫ່ງໜຶ່ງ ຢູ່ເມືອງກຸຍລາເດເມເລນາ  ( Guira de Melena), ແຂວງອາເຕມີສາ ( Artemisa), ສ.ກູບາ ເປັນໂຮງຮຽນມິດຕະພາບ ກູບາ-ລາວ ແລະ ກໍໄດ້ຫຼໍ່ຮູບເຄິ່ງຄີງ ຂອງ ທ່ານ ສີທົນ ກົມມະດຳ, ປະດິດສະຖານໄວ້ໂຮງຮຽນດັ່ງກ່າວ ໂດຍໃສ່ຊື່ໂຮງຮຽນວ່າ ສູນການສຶກສາແບບປະສົມ ສີທົນ ກົມມະດຳ ເພື່ອເປັນການລະນຶກເຖິງຜົນງານ ຄຸນງາມຄວາມດີ ຂອງ ທ່ານ ສີທົນ ກົມມະດຳ, ນັກຮັກຊາດທີ່ກ້າແກ່ນ, ໜື່ງໃນບັນດາຜູ້ນຳທັງປະຫວັດສາດ ໃນກາຕໍ່ສູ້ປະຕິວັດຂອງລາວ ແລະ ເພື່ອເສີມຂະຫຍາຍສາຍພົວພັນມິດຕະພາບ ອັນເປັນມູນເຊື້ອ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ກູບາ-ລາວ.

party x

Visitors

406218
Today192
Yesterday286
This_Week192
This_Month8681
All_Days406218