ໃນ​ຕອນ​ເຊົ້າຂອງ ​ວັນ​ທີ 02 ພະຈິກ2020, ທີ່ ​ສຳ​ນັກ​ງານ​ຄະ​ນະ​ພົວ​ພັນ​ຕ່າງ​ປະ​ເທດສູນ​ກາງ​ພັກ,​ທ່ານປອ ນ. ສູນທອນ ໄຊຍະຈັກ, ຫົວ​ໜ້າ​ຄ​ະ​ນະ​ພົວ​ພັນ​ຕ່າງ​ປະ​ເທດສູນ​ກາງ​ພັກ ໄດ້​ຕ້ອນຮັບການ​ເຂົ້າ​ຢ້ຽມ​ຂ່ຳ​ນັບຂອງ​ ທ່ານ ນ. Ina MARCICULIONYTE, ເອກອັກຄະລັດຖະທູດແຫ່ງສະຫະພາບເອີຣົບ ໃນໂອກາດມາດໍາລົງຕໍາແໜ່ງເອກອັກຄະລັດຖະທູດຄົນໃໝ່ ປະຈໍາ ສປປ ລາວ.

​ໃນການພົບປະ, ທ່ານ ​ປອ ນ. ສູນທອນ ໄຊຍະຈັກ ໄດ້ສະ​ແດງ​ຄວາມຕ້ອນຮັບອັນອົບອຸ່ນ ແລະ ຊົມເຊີຍທ່ານທູດທີ່ຖືກແຕ່ງຕັ້ງມາປະຕິບັດໜ້າທີ່ຢູ່ ສປປ ລາວ, ພ້ອມທັງຕີລາຄາສູງ ສາຍພົວພັນອັນດີລະຫວ່າງ ສປປ ລາວ ແລະ ສະຫະພາບເອີຣົບ ຕະຫຼອດໄລຍະ 45 ປີ ຜ່ານມາ, ສະແດງຄວາມຂອບໃຈສະຫະພາບເອີຣົບ ທີ່ໃຫ້ການຊ່ວຍເຫຼືອແກ່ ສປປ ລາວ ໃນໄລຍະຜ່ານມາ ແລະ ເຊື່ອໝັ້ນວ່າ ໃນໄລຍະທ່ານທູດມາປະຕິບັດໜ້າທີ່ຢູ່ລາວ ຈະສືບຕໍ່ປະກອບສ່ວນເຂົ້າໃນການເສີມສ້າງສາຍພົວພັນ ແລະ ການຮ່ວມມືສອງຝ່າຍ ໃຫ້ມີຜົນສໍາເລັດອັນໃໝ່ໃຫຍ່ຫຼວງກວ່າເກົ່າ ເພື່ອໃຫ້ ສປປ ລາວ ບັນລຸເປົ້າໝາຍການພັດທະນາແບບຍືນຍົງ ແລະ ນໍາເອົາປະເທດອອກຈາກສະຖານະພາບປະເທດດ້ອຍພັດທະນາໃນຕໍ່ໜ້າ.

ທ່ານທູດສະຫະພາບເອີຣົບຄົນໃໝ່ ໄດ້​​ສະແດງຄວາມຂອບ​ໃຈ​ຢ່າງ​ຈິງ​ໃຈຕໍ່ທ່ານຫົວໜ້າຄະນະພົວພັນຕ່າງປະເທດສູນກາງພັກ ​ທີ່​ໄດ້​ໃຫ້​ການ​ຕ້ອນຮັບ​ອັນ​ອົບ​ອຸ່ນໃນຄັ້ງນີ້,ພ້ອມທັງໄດ້ຊົມເຊີຍຕໍ່​ຜົນສຳ​ເລັດ ໃນ​ການສ້າງສາ​ພັດທະນາ​ປະ​ເທ​ດຂອງ ສ ປປ ລາວ, ພິເສດແມ່ນການຮັບມືກັບການແຜ່ລະບາດຂອງເຊື້ອພະຍາດ Covid-19. ພ້ອມນັ້ນ, ທ່ານທູດ ​ໄດ້​ຢືນ​ຢັນ​ວ່າ ຈະສືບຕໍ່ໃຫ້ການສະໜັບສະໜູນຊ່ວຍເຫຼືອ ສປປ ລາວ ໃນຂົງເຂດຕ່າງໆ ເພື່ອເສີມຂະຫຍາຍການພົວພັນ ລະຫວ່າງ ສປປ ລາວ ແລະ ສະຫະພາບເອີຣົບ ເພື່ອຜົນປະໂຫຍດຂອງສອງຝ່າຍກໍ່ຄື ເພື່ອພາລະກິດ ສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາຢູ່ໃນພາກພື້ນ ແລະ ໃນໂລກ.

​         ໃນຕອນທ້າຍ, ທ່ານ ປອ ນ. ສູນທອນ ໄຊຍະຈັກ, ຫົວໜ້າຄະນະພົວພັນຕ່າງປະເທດສູນກາງພັກ ​ໄດ້ອວຍ​ພອນ​ໃຫ້​ແກ່ທ່ານທູດສະຫະພາບເອີຣົບ ຈົ່ງມີສຸຂະພາບແຂງແຮງ ແລະ ປະ​ສົບ​ຜົນສຳ​ເລັດ​ໃນການປະຕິບັດ​​ໜ້າການທູດອັນມີກຽດຂອງທ່ານຢູ່ ສປປ ລາວ.

         ໃນ​ຕອນ​ເຊົ້າຂອງ​ວັນ​ທີ 22 ຕຸລາ 2020, ທີ່​ສຳນັກງານ​ຄະນະ​ພົວພັນ​ຕ່າງປະ​ເທດ​ສູນ​ກາ​ງພັກ, ທ່ານ ປອ. ນາງ ສູນ​ທອນ ​ໄຊ​ຍະ​ຈັກ, ກໍາມະການ​ສູນ​ກາງ​ພັກ, ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ຕ້ອນຮັບການ​ເຂົ້າ​ຢ້ຽມ​ອຳ​ລາ​ຂອງ ​ທ່ານ ​Jean Bernard Carrasco, ​ເອກ​ອັກຄະ​ລັດຖະທູດວິສາມັນຜູ້ມີອໍານາດເຕັມ​ແຫ່ງ ອົດສະຕຣາລີ ປະຈຳ ສປປ ລາວ ​ໃນ​ໂອກາດ​ທີ່​ສຳ​ເລັດ​ໜ້າ​ທີ່ການ​ທູດຢູ່ ສປປ ລາວ.

    ໃນ​ໂອກາດ​ນີ້ ທ່ານຫົວໜ້າຄະນະພົວພັນຕ່າງປະເທດສູນກາງພັກ ​ໄດ້​ສະ​ແດງ​ຄວາມ​ຊົມ​ເຊີ​ຍ ​ແລະ ຕີ​ລາຄາ​ສູງ​ຕໍ່ ຜົນສຳ​ເລັດ​ໃນ​ການ​ປະຕິບັດ​ໜ້າ​ທີ່​ການ​ທູດ​ຢູ່ ສປປ ລາວ ຂອງ ທ່ານ Jean Bernard Carrasco ເຊິ່ງເປັນ​ການ​ປະກອບສ່ວນ​ອັນ​ສຳຄັນ​ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ ລະຫວ່າງ ສອງ​ລັດ ​ແລະ ປະຊາຊົນສອງ​ຊາດ ລາວ-​ອົດສະຕຣາລີ ​ໃຫ້​ນັບ​ມື້​ນັບ​ແຕກ​ດອກ​ອອກ​ຜົນ; ທ່ານຫົວໜ້າ​ຄະນະ​ພົວພັນຕ່າງປະ​ເທດ​ສູນ​ກາງພັກ ​ໄດ້​ຕີ​ລາຄາ​ສູງ​ຕໍ່ໂຄງການຊ່ວຍເຫຼືອດ້ານຕ່າງໆຂອງລັດຖະບານອົດສະຕຣາລີທີ່ມີຕໍ່ ສປປ ລາວ ເປັນຕົ້ນ ໂຄງການຊ່ວຍເຫຼືອທາງການດ້ານການສຶກສາ, ສາທາລະນະສຸກ, ການຊ່ວຍເຫຼືອດ້ານມະນຸດສະທໍາໃຫ້ແກ່ ສປປ ລາວ ໃນເວລາທີ່ເກີດໄພພິບັດ ຢູ່ ແຂວງ ອັດຕະປື ແລະ ໂຄງການອື່ນໆອີກ ເຊິ່ງທຸກໂຄງການລ້ວນແລ້ວແຕ່ເປັນການປະກອບສ່ວນເຂົ້າໃນການພັດທະນາປະເທດ ກໍຄືພັດທະນາຊັບພະຍາກອນມະນຸດໃຫ້ແກ່ ສປປ ລາວ. ​ໃນ​ໂອກາດ​ນີ້ ທ່ານ​ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ກໍ​ໄດ້​ອວຍພອນ​ໃຫ້​ທ່ານ ທູດ ອົດສະຕຣາລີ ​ແລະ ຄອບຄົວ ມີ​ພາລະ​ນາ​ໄມ​ສົມບູນ, ເດີ​ນທາງ​ກັບ​ຄືນ​ປ​ະ​ເທດ​ດ້ວຍ​ຄວມສະ​ຫວັດ​ດີ​ພາບ ​ແລະ ປະສົບ​ຜົນ​ສຳ​ເລັດ​​ໃນ​ຫນ້າ​ທີ່​ວຽກ​ງານ​ ໃໝ່​ຂອງ​ທ່ານ.

          ທ່ານ Jean Bernard Carrasco ​ໄດ້​ສະ​ແດງ​ຄວາມ​ຂອບ​ໃຈ​ຢ່າງ​ຈິງ​ໃຈ  ມາຍັງ ຫົວໜ້າ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ທີ່ໄດ້ໃຫ້ການ​ຕ້ອນຮັບ​ອັນ​ອົບອຸ່ນ ​ໃນ​ໂອກາດ​ເຂົ້າ​ຢ້ຽມ​ອຳ​ລາ​ໃນ​ຄັ້ງ​ນີ້ ​ແລະ ສະ​ແດງ​ຄວາມຂອບ​ໃຈ​ຕໍ່​ ລັດຖະບານ ສປປ ລາວ ​ເວົ້າ​ລວມ, ​ເວົ້າ​ສະ​ເພາະ ຕໍ່​ການ​ນໍາ​ຂອງຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ​ທີ່​ໄດ້​ໃຫ້ການ​ຮ່ວມ​ມື ແລະ ອຳນວຍ​ຄວາມ​ສະດວກ​ໃນ​ການ​ປະຕິບັດ​ໜ້າ​ທີ່​ການ​ທູດ​ຂອງ​ຕົນ ຢູ່ ສປປ ລາວ ​ຕະຫຼອດ​ໄລຍະ​ທີ່​ຜ່ານ​ມາຈົນ​ໄດ້​ຮັບ​ຜົນສຳ​ເລັດ​ຢ່າງ​ຈົບງາມ. ​ທ່ານ​ທູ​ດ​ໄດ້​ອວຍພອນ ທ່ານ ນາງ. ປອ ສູນ​ທອນ​ ​ ໄຊ​ຍະ​ຈັກ ພ້ອມ​ດ້ວຍຄະນະ​ນຳ ​ແລະ ພະນັກງານ​ທົ່ວ​ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກຈົ່ງມີ​ສຸຂະພາບ​​ເຂັ້ມ​ແຂງ, ມີ​ພາລະ​ນາ​ໄມ​ສົມ​ບູນ ​ແລະ ປະສົບ​ຜົນສຳ​ເລັດ​ໃນ​ໜ້າ​ທີ່​ອັນ​ມີ​ກຽດ​ຂອງຕົນ​ທຸກ​ປະການ.

ໃນຕອນເຊົ້າຂອງວັນທີ 21 ຕຸລາ 2020 ນີ້, ຄະນະພົວພັນຕ່າງປະເທດສູນກາງພັກ (ຄຕພ) ໄດ້ຈັດປາຖະກະຖາເອກະສານວັນສຳຄັນຂອງພັກ, ຂອງຊາດ ເປັນຕົ້ນແມ່ນ: ວັນປະກາດເອກະລາດ ຄົບຮອບ 75 ປີ(12/10/1945-12/10/2020), ວັນສ້າງຕັ້ງການທູດລາວຄົບຮອບ 75 ປີ(12/10/1945-12/10/2020) ແລະ ເຊື່ອມຊືມມະຕິຂອງກົມການເມືອງສູນກາງພັກ ເລກທີ 118/ກມສພ ວ່າດ້ວຍການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ເຊິ່ງໃຫ້ກຽດປາຖະກະຖາໂດຍ ສະຫາຍ ປອ. ນາງ ສູນທອນ ໄຊຍະຈັກ, ກຳມະການສູນກາງພັກ, ເລຂາຄະນະພັກ, ຫົວໜ້າຄະນະພົວພັນຕ່າງປະເທດສູນກາງພັກ. ມີບັນດາສະຫາຍ ໃນຄະນະບໍລິຫານງານພັກ, ຄະນະກົມ, ພະແນກ, ສະມາຊິກພັກ ແລະ ພະນັກງານຫຼັກແຫຼ່ງທົ່ວ ຄຕພ ເຂົ້າຮ່ວມຢ່າງພ້ອມພຽງ.

  ໃນການປາຖະກະຖາຄັ້ງນີ້ ສະຫາຍ ຫົວໜ້າ ຄຕພ ໄດ້ຍົກໃຫ້ເຫັນເຖິງມູນເຊື້ອການຕໍ່ສູ້ກູ້ຊາດຍາດເອົາເອກະລາດ ແລະ ອິດສະຫຼະພາບຂອງປະຊາຊົນລາວບັນດາເຜົ່າ ຈາກພວກລ່າເມືອງຂຶ້ນແບບເກົ່າ ແລະ ແບບໃໝ່ ພາຍໃຕ້ການນຳພາອັນສະຫຼາດສ່ອງໃສຂອງພັກປະຊາຊົນປະຕິວັດລາວໃນແຕ່ລະໄລຍະຈົນກ້າວໄປເຖິງໄຊຊະນະ ແລະ ການປະກາດເອກະລາດ 12 ຕຸລາ 1945, ເຊິ່ງໄດ້ເຮັດໃຫ້ຊາວໂລກໄດ້ຮັບຮູ້ ກ່ຽວກັບ ຄວາມເປັນເອກະລາດຊາດລາວ, ຮັບຮູ້ອະທິປະໄຕ ແລະ ເຂດນ້ຳແດນດິນຂອງລາວ ແລະ ຍັງຖືເປັນວັນກຳເນີດ “ ວັນການທູດລາວ”” ແລະ ໄດ້ຫວນຄືນການຕໍ່ສູ້ອັນພິລະອາດຫານ ຂອງປະຊາຊົນລາວ ພາຍໃຕ້ການນໍາພາ ຂອງ ພັກປະຊາຊົນໃນເມື່ອກ່ອນ, ພັກປະຊາຊົນ ປະຕິວັດລາວ ໃນໄລຍະຕໍ່ມາຈົນສາມາດຍາດໄດ້ໄຊຊະນະສຸດທ້າຍ, ເຮັດສໍາເລັດການປະຕິວັດຊາດ ປະຊາທິປະໄຕ ແລະ ສະຖາປານາເປັນສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ.

 ໃນຕອນທ້າຍສະຫາຍຫົວໜ້າຄະນະພົວພັນຕ່າງປະເທດສູນກາງພັກ ໄດ້ສືບຕໍ່ເຜີຍແຜ່ເນື້ອໃນສຳຄັນຂອງມະຕິ ເລກທີ 118 ຂອງກົມການເມືອງສູນກາງພັກ ວ່າດ້ວຍການເພີ່ມທະວີການຊີ້ນໍາໆພາ ຂອງຄະນະພັກຕໍ່ການເລືອກຕັ້ງສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II, ຊີ້ໃຫ້ເຫັນທັດສະນະ ຂອງພັກເຮົາຕໍ່ການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ໄດ້ຍົກໃຫ້ເຫັນ ຈຸດປະສົງ, ລະດັບຄາດໝາຍ ແລະ ບັນດາທິດທາງວຽກງານຕົ້ນຕໍໃນການກະກຽມການເລືອກຕັ້ງທີ່ຈະມາເຖິງ, ເປັນຕົ້ນແມ່ນ: ວຽກງານເຜີຍແຜ່-ຮ່ຳຮຽນ ແລະ ເຊື່ອມຊຶມບັນດາເອກະສານ ກ່ຽວກັບ ການເລືອກຕັ້ງ ‚ວຽກງານໂຄສະນາ, ແຂ່ງຂັນ ແລະ ຍ້ອງຍໍ ƒວຽກງານບຸກຄະລາກອນ „ວຽກງານງົບປະມານ …ການຈັດຕັ້ງປະຕິບັດ.

 ຫຼັງຈາກນັ້ນ, ພະນັກງານທີ່ເຂົ້າຮັບຟັງການເຜີຍແຜ່ ກໍ່ໄດ້ສະເໜີການແລກປ່ຽນ, ປະກອບຄຳເຫັນຢ່າງກົງໄປກົງມາ, ໄດ້ສ້າງຄວາມເຂົ້າໃຈຢ່າງເລິກເຊິ່ງໃຫ້ພະນັກງານໃນ ຄຕພ.

ໃນຕອນເຊົ້າຂອງວັນທີ 21 ຕຸລາ 2020, ຄະນະພົວພັນຕ່າງປະເທດສູນກາງພັກ ໄດ້ຈັດພິທີມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ແກ່ໜ່ວຍພັກກົມ ເອີຣົບ - ອາເມຣິກາ. ໂດຍໃຫ້ກຽດເປັນປະທານ ໂດຍ ສະຫາຍ ປອ ນາງ ສູນທອນ ໄຊຍະຈັກ, ກໍາມະການສູນກາງພັກ, ເລຂາຄະນະບໍລິຫານງານພັກ,  ຫົວໜ້າຄະນະພົວພັນຕ່າງປະເທດສູນກາງພັກ ແລະ ມີບັນດາສະຫາຍໃນຄະນະບໍລິຫານງານພັກ, ຄະນະໜ່ວຍພັກ, ຄະນະກົມ,ສະມາຊິກພັກອ້ອມຂ້າງຄະນະພົວພັນຕ່າງປະເທດເຂົ້າຮ່ວມຢ່າງພ້ອມພຽງ.

ໃນພິທີ ສະຫາຍ ບຸນເບັງ ໄຊຍະປັນຍາ, ເລຂາໜ່ວຍພັກກົມ ເອີຣົບ - ອາເມຣິກາ ໄດ້ຜ່ານບົດສະຫຼຸບລາຍງານໃນປີຜ່ານມາ ໃນການກໍ່ສ້າງໜ່ວຍພັກຈົນສາມາດໄດ້ຮັບນາມມະຍົດເປັນໜ່ວຍພັກ ປອດໃສ, ເຂັ້ມແຂງ, ໜັກແໜ້ນໃນມືື້ນີ້. ໜ່ວຍພັກກົມ ເອີຣົບ - ອາເມຣິກາ ເຊິ່ງເປັນໜ່ວຍພັກໜຶ່ງທີ່ຂຶ້ນກັບ ຄະນະພັກ ຄະນະພົວພັນຕ່າງປະເທດສູນກາງພັກ ໄດ້ເອົາໃຈໃສ່ໃນການປະຕິບັດໜ້າທີ່ການເມືອງຂອງຕົນ ເຊິ່ງໜ່ວຍພັກສາມາດຍາດໄດ້ຜົນສໍາເລັດໃນຫຼາຍດ້ານເປັນຕົ້ນແມ່ນ ການຄົ້ນຄວ້າວິເຄາະວິໄຈສະພາບການຂອງພາກພື້ນສາກົນໃນຂົງເຂດພັກການເມືອງຕິດພັນກັບການສຶກສາອົບຮົມການເມືອງແນວຄິດ, ປັບປຸງການຈັດຕັ້ງ ແລະ ແບບແຜນວິທີນໍາພາ ຕາມລະບຽບຫຼັກການຂອງພັກໄດ້ຢ່າງດີ. ມາຮອດປັດຈຸບັນ ທົ່ວອົງຄະນະພັກ ຄະນະພົວພັນຕ່າງປະເທດສູນກາງພັກ ສາມາດສ້າງໜ່ວຍພັກ ປອດໃສ, ເຂັ້ມແຂງ, ໜັກແໜ້ນ ໄດ້ 100% ອັນເປັນການເພີ່ມກໍາລັງແຮງໃຫ້ແກ່ທົ່ວ ອົງຄະນະພັກ ໃນການປະຕິບັດໜ້າທີ່ການເມືອງຂອງຕົນ.

ຈາກນັ້ນ ສະຫາຍ ປອ ນາງ ສູນທອນ ໄຊຍະຈັກ, ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າຄະນະພົວພັນຕ່າງປະເທດສູນກາງພັກກໍໄດ້ໃຫ້ກຽດຂຶ້ນມອບໃບຢັ້ງຢືນໜ່ວຍພັກປອດໃສ, ເຂັ້ມແຂງ,ໜັກແໜ້ນ ໃຫ້ແກ່ໜ່ວຍພັກໜ່ວຍພັກກົມ ເອີຣົບ - ອາເມຣິກາ ມີຄໍາເຫັນໂອ້ລົມ, ໂດຍໄດ້ສະແດງຄວາມຍ້ອງຍໍຊົມເຊີຍມາຍັງໜ່ວຍພັກກົມ ເອີຣົບ - ອາເມຣິກາ ທີ່ໄດ້ເອົາໃຈໃສ່ປັງປຸງກໍ່ສ້າງໜ່ວຍພັກຕົນໃຫ້ໄດ້ຮັບນາມມະຍົດເປັນໜ່ວຍພັກໜ່ວຍພັກປອດໃສ, ເຂັ້ມແຂງ,ໜັກແໜ້ນ ແລະ ສະແດງຄວາມຫວັງວ່າບັນດາໜ່ວຍພັກ ໃນຄະນະພົວພັນຕ່າງປະເທດສູນກາງພັກ ຈະສືບຕໍ່ນໍາພາໜ່ວຍພັກຂອງຕົນ ເຮັດສໍາເລັດພາລະບົດບາດໜ້າທີ່ ຂອງຕົນ, ການກ້າວໄປສູ່ການກະກຽມກອງປະຊຸມໃຫຍ່ ຄັ້ງທີII ຂອງອົງຄະນະພັກໃນຕໍ່ໜ້າ.