ໂດຍຕອບສະໜອງຕາມການເຊື້ອເຊີນຂອງ ພັກກອມມູນິດຕວັກກີ ແລະ ພັກກອມມູນິດເກຣັກ, ຄະນະຜູ້ແທນພັກ ປປ ລາວ ນຳໂດຍ ສະຫາຍ ສົມພອນ ສີຈະເລີນ, ຮອງຫົວໜ້າຄະນະພົວພັນຕ່າງປະເທດສູນກາງພັກ ໄດ້ເດີນທາງໄປເຂົ້າຮ່ວມ ກອງປະຊຸມສາກົນ ຂອງພັກກອມມູນິດ ແລະ ກຳມະກອນ ຄັ້ງທີ 21 (The 21th International Meeting of Communist and Workers’ Parties)  ທີ່ຈັດຂື້ນແຕ່ວັນທີ 18-20 ຕຸລາ 2019, ທີ່ເມືອງອີດສະເມຍ, ປະເທດຕວັກກີ ພາຍໃຕ້ຫົວຂໍ້: “ຄົບຮອບ 100 ປີ ຂອງການສ້າງຕັ້ງກອມມູນິດສາກົນ. ສືບຕໍ່ການຕໍ່ສູ້ເພື່ອສັນຕິພາບ ແລະ ສັງຄົມນິຍົມ” ຫຼື "100th Anniversary of the founding of the Communist International. The fight for peace and socialism continues!” ໂດຍມີຜູ້ແທນເຂົ້າຮ່ວມ 137 ຄົນ ທີ່ເປັນຕົວແທນໃຫ້ແກ່ 74 ພັກກອມ ມູນິດ ແລະ ກຳມະກອນ ທີ່ມາຈາກ 58 ປະເທດ ໃນພາກພື້ນຕ່າງໆຂອງໂລກ.

   ກອງປະຊຸມສາກົນ ຂອງພັກກອມມູນິດ ແລະ ກຳມະກອນຄັ້ງນີ້ ໄດ້ດຳເນີນໄປພາຍໃຕ້ບັນຍາກາດແຫ່ງການ ລະນຶກເຖິງວັນຄົບຮອບ 100 ປີ ແຫ່ງ ການສ້າງຕັ້ງກອມມູນິດສາກົນ (Communist International). ບັນດາຜູ້ແທນ ທີ່ເຂົ້າຮ່ວມກອງປະຊຸມ ໄດ້ທົບທວນຄືນຄວາມໝາຍສຳຄັນຂອງ ແນວຄວາມຄິດ, ພື້ນຖານຫຼັກການໃນການສ້າງຕັ້ງ ກອມມູນິດສາກົນ ແລະ ຜົນສະທ້ອນຂອງກອມມູນິດສາກົນ ຕໍ່ຂະບວນການປະຕິວັດ ແລະ ການ ເຕົ້າໂຮມຄວາມ ສາມັກຄີສາກົນ ຂອງຊາວກອມມູນິດ ແລະ ກໍາມະກອນໃນໂລກ ກໍ່ຄືຕໍ່ພາລະກິດປົກປັກຮັກສາສັນຕິພາບ ແລະ ການພັດທະນາຂອງ ບັນດາປະຊາຊາດ ແລະ ການກໍ່ສ້າງສັງຄົມນິຍົມ ໃນໂລກ.
   ຄະນະຜູ້ແທນພັກ ປປ ລາວ ໄດ້ປະກອບຄຳເຫັນ ໂດຍໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ການເປັນ ເຈົ້າພາບກອງປະຊຸມ ຂອງພັກ ກອມມູນິດຕວັກກີ ແລະ ພັກກອມມູນິດເກຼັກ, ທັງຍົກໃຫ້ເຫັນ ຄວາມສຳຄັນຂອງສັນຕິພາບ ເຊິ່ງແມ່ນປັດໄຈທີ່ຈຳເປັນ ແລະ ຂາດບໍ່ໄດ້ຂອງການ ພັດທະນາ. ພ້ອມນັ້ນ, ກໍໄດ້ຍົກໃຫ້ເຫັນ ການຕໍ່ສູ້ ຂອງປະຊາຊົນລາວ ເພື່ອສັນຕິພາບ ແລະ ເອກະລາດແຫ່ງຊາດ ໃນເມື່ອກ່ອນ ແລະ ການດໍາເນີນ ພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມເສັ້ນທາງສັງຄົມນິຍົມ ທີ່ເຕັມໄປດ້ວຍຄວາມທ້າທາຍໃນປັດຈຸບັນນັ້ນ ແມ່ນໄດ້ ຮັບການຊີ້ນໍາ-ນໍາພາ ໂດຍພັກປະຊາຊົນ ປະຕິວັດລາວ, ເຊິ່ງເປັນພັກປະຕິວັດ ຂອງຊົນຊັ້ນກໍາມະກອນລາວ ທີ່ເວລາໃດ ກໍ່ຢຶດໝັ້ນລັດທິມາກ-ເລນິນ ເປັນພື້ນຖານດ້ານແນວຄິດ-ທິດສະດີ  ແລະ ໝູນໃຊ້ທິດສະດີມາກ-ເລນິນ ຢ່າງປະດິດສ້າງ ແລະ ສອດຄ່ອງກັບຈຸດພິເສດຂອງປະເທດ. ພັກ ປປ ລາວ ໄດ້ສົມທົບແໜ້ນ ລະຫວ່າງ ລັດທິຮັກຊາດ ກັບລັດທິສາກົນ ກໍາມະຊີບອັນຜ່ອງໃສ, ຮູ້ສົມທົບກົມກຽວກໍາລັງແຮງຂອງຊາດກັບກໍາລັງແຮງຂອງຍຸກສະ ໄໝ ພາຍໃຕ້ແນວທາງ ການຕ່າງປະເທດ ສັນຕິພາບ, ເອກະລາດ, ມິດຕະພາບ ແລະ ການຮ່ວມມື. ບົນພື້ນຖານດັ່ງກ່າວ, ຈຶ່ງເຮັດໃຫ້ການຕໍ່ສູ້ ຂອງ ປະຊາຊົນລາວ ໄດ້ຮັບຄວາມເປັນໃຈ, ການສະໜັບສະໜູນ ແລະ ຊ່ວຍເຫຼືອອັນໃຫຍ່ຫຼວງ ແລະ ຈິງໃຈຈາກບັນດາ ປະເທດ ກໍ່ຄື ບັນດາພັກການເມືອງ ອ້າຍນ້ອງ, ເພື່ອນມິດ, ອົງການຈັດຕັ້ງສາກົນ, ປະຊາຊົນຜູ້ຮັກຫອມສັນຕິພາບ ແລະ ຮັກຄວາມເປັນທໍາ ໃນທົ່ວໂລກ, ຈົນສາມາດຍາດໄດ້ໄຊຊະນະ ໃນການຕໍ່ສູ້ກູ້ຊາດ ປະກາດສ້າງຕັ້ງ ສປປ ລາວ ຢ່າງເປັນ ທາງການໃນວັນທີ 2 ທັນວາ 1975 ແລະ ສືບຕໍ່ພາລະກິດປົກປັກຮັກສາ ແລະ ພັດທະນາ ສ້າງສາປະເທດຊາດ ກ້າວຂື້ນຕາມທິດສັງຄົມນິຍົມ.
   ກອງປະຊຸມສາກົນຄັ້ງນີ້ ໄດ້ປະສົບຜົນສຳເລັດຢ່າງຈົບງາມ, ບັນດາຄະນະຜູ້ແທນກອງປະຊຸມໄດ້ເປັນເອກະພາບກັນຮັບຮອງເອົາຄຳຮຽກຮ້ອງຂອງ ກອງປະຊຸມສາກົນ ຄັ້ງທີ 21 ຂອງພັກກອມມູນິດ ແລະ ກຳມະກອນ.
   ໃນໂອກາດເຂົ້າຮ່ວມກອງປະຊຸມຄັ້ງນີ້, ຄະນະຜູ້ແທນພັກ ປປ ລາວ ຍັງໄດ້ພົບປະກັບບັນດາຄະນະຜູ້ແທນທີ່ ເຂົ້າຮ່ວມກອງປະຊຸມດັ່ງກ່າວ ເປັນຕົ້ນ ແມ່ນ ພັກກອມມູນິດຫວຽດນາມ, ພັກກອມມູນີດຈີນ, ພັກແຮງງານເກົາຫຼີ, ພັກກອມມູນິດກູບາ, ພັກກອມມູນິດຕວັກກີ, ພັກກອມມູນິດເນປານ, ພັກແຮງງານຮົງກາລີ, ພັກກອມມູນິດໄຊປຣັດ, ພັກກອມມູນິດອີຕາລີ, ພັກກອມມູນິດອິດສະລາແອນ ແລະ ອື່ນໆ.

   ໃນຕອນເຊົ້າຂອງວັນທີ 08/10/2019, ຄະນະພົວພັນຕ່າງປະເທດສູນກາງພັກ ໄດ້ຈັດປາຖະກະຖາເຊື່ອມຊຶມ ເອກະສານສຳ ຄັນຂອງພັກ, ຂອງຊາດຄື: ວັນປະກາດເອກະລາດ ຄົບຮອບ 74 ປີ; ວັນການທູດລາວ ຄົບຮອບ 74 ປີ; ວັນສ້າງຕັ້ງສະຫະພັນ ນັກຮົບເກົ່າແຫ່ງຊາດລາວ ຄົບຮອບ 17 ປີ ແລະ ວັນສາກົນ ແລະ ສັບປະດາແຫ່ງຊາດ ເພື່ອລຶບລ້າງຄວາມທຸກຍາກ ຂອງ ສປປ ລາວ, ເຊິ່ງໃຫ້ກຽດປາຖະກະຖາໂດຍ  ສະຫາຍ ປອ ນາງ ສູນທອນ ໄຊຍະຈັກ, ກໍາມະການສູນກາງພັກ, ເລຂາຄະນະພັກ, ຫົວໜ້າ ຄະນະພົວພັນຕ່າງປະເທດສູນກາງພັກ, ມີບັນດາສະຫາຍ ໃນຄະນະພັກ, ຄະນະກົມ, ພະແນກ ແລະ ພະນັກງານວິຊາການພາຍ ໃນຄະນະພົວພັນຕ່າງປະເທດສູນກາງພັກ ເຂົ້າຮ່ວມຮັບຟັງຢ່າງພ້ອມພຽງ.
   ໃນການປາຖະກະຖາໃນຄັ້ງນີ້, ສະຫາຍ ຫົວໜ້າ ຄະນະພົວພັນຕ່າງປະເທດສູນກາງພັກ ໄດ້ຫວນຄືນມູນເຊື້ອອັນພິລະອາດຫານ ໃນຂະບວນການຕໍ່ສູ້ຂອງ ປະຊາຊົນລາວ ຕ້ານການຮຸກຮານຂອງຕ່າງດ້າວ ໂດຍພາຍໃຕ້ການນໍາພາຂອງນັກວິລະຊົນ, ວິລະບູລຸດ ຜູ້ເກັ່ງກ້າ ໃນໄລຍະທີ່ບໍ່ທັນມີພັກນໍາພາ ແລະ ການຕໍ່ສູ້ກູ້ຊາດຕ້ານພວກລ່າເມືອງຂຶ້ນ ພາຍໃຕ້ການນໍາພາຂອງພັກກອມມູນິດ ອິນດູຈີນ ນັບແຕ່ປີ 1930 ແລະ ນັບແຕ່ມື້ໄດ້ສ້າງຕັ້ງອົງຄະນະພັກແຄວ້ນລາວ ເຮັດໃຫ້ການຕໍ່ສູ້ຂອງປະຊາຊົນລາວ ຍາດໄດ້ໄຊ ຊະນະຢ່າງເນືອງນິດລຽນຕິດຈົນສາມາດ ປະກາດເອກະລາດຕໍ່ຊາວໂລກໃນວັນທີ 12 ຕຸລາ 1945. ຕະຫຼອດໄລຍະນັບແຕ່ປີ 1945 ພັກໄດ້ສືບຕໍ່ນໍາພາການຕໍ່ສູ້ຢ່າງພິລະອາດຫານ, ທໍລະຫົດອົດທົນ ຈົນສາມາດປົດປ່ອຍປະເທດຊາດໄດ້ຢ່າງສົມບູນ ແລະ ສະຖາປະນາ ເປັນ ສາທາລະນາລັດປະຊາທິປະໄຕ ປະຊາຊົນລາວ ໃນປີ 1975.  
   ຫົວໜ້າ ຄຕພ ຍັງໄດ້ເຜີຍແຜ່ກ່ຽວກັບຄວາມເປັນມາຂອງວັນສ້າງຕັ້ງວັນການທູດລາວ, ບັນດາຜົນສໍາເລັດ ໃນການເປີດ ກວ້າງ ການພົວພັນກັບສາກົນ ຂອງ ສປປ ລາວ ໃນແຕ່ລະໄລຍະ ແລະ ບາງບົດຮຽນການເຄື່ອນໄຫວວຽກງານການຕ່າງປະເທດ ຂອງ ສປປ ລາວ.

   ຫຼັງຈາກນັ້ນ, ສະຫາຍ ຫົວໜ້າ ຄະນະພົວພັນຕ່າງປະເທດສູນກາງພັກ ໄດ້ຫວນຄືນເຖິງ ຄຸນງາມຄວາມດີຂອງ ບັນດາອະດີດ ນັກຮົບປະຕິວັດ ໃນໂອກາດຄົບຮອບ 17 ປີ ວັນສ້າງຕັ້ງສະຫະພັນນັກຮົບເກົ່າ.
   ສະຫາຍຫົວໜ້າ ຄະນະພົວພັນຕ່າງປະເທດສູນກາງພັກ ໄດ້ສືບຕໍ່ຫວນຄືນປະຫວັດຄວາມເປັນມາຂອງ ວັນສາກົນ ແລະ ສັບ ປະດາແຫ່ງຊາດ ເພື່ອລຶບລ້າງຄວາມທຸກຍາກ ຂອງ ສປປ ລາວ, ໃນຖານະທີ່ ສປປ ລາວ ເປັນປະເທດສະມາຊິກ ຂອງອົງການ ສະຫະປະຊາຊາດ ຍາມໃດກໍຖືວ່າວຽກງານການແກ້ໄຂຄວາມທຸກຍາກຂອງປະຊາຊົນເປັນວຽກຍຸດທະສາດສໍາຄັນ, ເປັນໜ້າທີ່ບູລີ ມະສິດ ຂອງທົ່ວພັກ - ລັດ, ທົ່ວປວງຊົນ ໄດ້ເອົາໃຈໃສ່ຊີ່ນໍາການຈັດຕັ້ງວຽກງານດັ່ງກ່າວຢ່າງຕັ້ງໜ້າຕະຫຼອດມາ.
   ການຈັດຕັ້ງເຊື່ອມຊຶມເອກະສານສໍາຄັນດັ່ງກ່າວ ໄດ້ເປັນໂອກາດທີ່ດີໃຫ້ແກ່ພະນັກງານ ຄຕພ ເຫັນໄດ້ມູນເຊື້ອອັນດີງາມຂອງ ປະຊາຊົນລາວໃນການຕໍ່ສູ້ຍາດເອົາເອກະລາດແຫ່ງຊາດ ພາຍໃຕ້ການນໍາພາອັນຖືກຕ້ອງຂອງພັກ ປປ ລາວ, ສ້າງໃຫ້ພະນັກງານ ເຫັນໄດ້ຄວາມຮັບຜິດຊອບໃນການສືບຕໍ່ພາລະກິດ ປົກປັກຮັກສາ ແລະ ສ້າງສາປະເທດຊາດໃນປັດຈຸບັນ.

   ວັນທີ 3 ຕຸລາ 2019 ທີ່ຄະນະພົວພັນຕ່າງປະເທດສູນກາງພັກ, ທ່ານ ປອ. ນາງ ສູນທອນ ໄຊຍະຈັກ, ກຳມະການສູນກາງພັກ, ຫົວຫນ້າຄະນະພົວພັນຕ່າງປະເທດສູນກາງພັກ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ແລວ ສຸ ລິນ (Leow Siu Lin) ແລະ ທ່ານ ເຄໂຊ ທາເກວະກະ (Keizo TAKEWAKA), ເນື່ອງໃນໂອກາດມາດຳລົງຕຳແໜ່ງເອກອັກຄະລັດຖະທູດວິສາມັນຜູ້ມີອຳນາດເຕັມຄົນ ໃໝ່ຂອງ ປະເທດ ສິງກະໂປ ແລະ ຍີ່ປຸ່ນ ປະຈຳ ສປປ ລາວ.
   ທ່ານ ປອ. ນາງ ສູນທອນ ໄຊຍະຈັກ ໄດ້ສະແດງຄວາມຊົມເຊີຍ ແລະ ອວຍພອນ ທ່ານ ທູດສິງກະໂປ ແລະ ຍີ່ປຸ່ນ ທີ່ໄດ້ຮັບມອບໝາຍເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ປະ ເທດ ສິງກະໂປ ແລະ ຍີ່ປຸ່ນ ປະຈຳ ສປປ ລາວ ຄົນໃໝ່ ແລະ ສະແດງຄວາມເຊື່ອໝັ້ນວ່າ ທ່ານເອກອັກຄະລັດຖະທູດ ທັງ 02 ຈະສືບຕໍ່ໃຫ້ການຮ່ວມມື ແລະ ປະສານສົມທົບຢ່າງແໜ້ນແຟ້ນກັບພາກສ່ວນກ່ຽວ ຂ້ອງຂອງ ລາວ ໃນການປະຕິບັດໜ້າທີ່ເປັນຂົວຕໍ່ມິດຕະພາບລະຫວ່າງປະຊາຊົນ ສິງກະໂປ, ຍີ່ປຸ່ນ ແລະ ສປປ ລາວ, ເພື່ອປະກອບສ່ວນເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມື ລະຫວ່າງ ລັດ ແລະ ປະຊາຊົນ ກັບ ສິງກະໂປ, ຍີ່ປຸ່ນ ແລະ ສປປ ລາວ ໃຫ້ນັບມື້ນັບມີປະສິດທິຜົນຍິ່ງໆຂື້ນ.
   ທ່ານທູດສິງກະໂປ ແລະ ຍີ່ປຸ່ນ ໄດ້ສະແດງຄວາມຂອບໃຈເປັນຢ່າງສູງ ທີ່ໄດ້ມີໂອກາດເຂົ້າຢ້ຽມຂໍ່ານັບທ່ານຫົວໜ້າຄະນະພົວພັນຕ່າງປະເທດສູນກາງພັກ ໃນໂອກາດທີ່ຕົນມາຮັບໜ້າທີ່ເປັນເອກອັກຄະລັດ ຖະທູດວິສາມັນຜູ້ມີອຳນາດເຕັມແຫ່ງ ປະເທດ ສິງກະໂປ ແລະ ຍີ່ປຸ່ນ ປະຈຳ ສປປ ລາວ ຄົນໃໝ່ ແລະ ໃຫ້ຄວາມໝັ້ນໝາຍວ່າພວກຕົນຈະເຮັດສຸດຄວາມສາມາດຂອງຕົນ ເພື່ອສືບຕໍ່ເສີມຂະຫຍາຍສາຍພົວພັນມິດ ຕະພາບທີ່ມີມູນເຊື້ອລະຫວ່າງ ປະເທດສິງກະໂປ ແລະ ຍີ່ປຸ່ນ ກັບ ສປປ ລາວ, ເພື່ອຜົນປະໂຫຍດຂອງ ປະຊາຊົນ ສິງກະໂປ, ຍີ່ປຸ່ນ ແລະ ສປປ ລາວ ທັງເປັນການປະກອບສ່ວນເຂົ້າໃນພາລະກິດສັນຕິພາບ, ມິດຕະພາບ ແລະ ການຮ່ວມມືເພື່ອການພັດທະນາໃນພາກພື້ນ ແລະ ໃນໂລກ.

   ໃນຕອນເຊົ້າຂອງວັນທີ 03 ກັນຍາ 2019 ທີ່ ຄະນະພົວພັນຕ່າງປະເທດສູນກາງພັກ, ທ່ານ ປອ. ນາງ ສູນທອນ ໄຊຍະຈັກ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອໍາລາຂອງທ່ານ ມີຄາອິນ ບາຣານນົບ, ເອກອັກຄະລັດຖະທູດ ວິສາມັນຜູ້ມີອໍານາດເຕັມ ແຫ່ງສະຫະພັນ ຣັດເຊຍ ປະຈຳ ສປປ ລາວ ກ່ອນຈະເດີນທາງກັບຄືນປະເທດ ພາຍຫຼັງສຳເລັດການປະຕິບັດໜ້າທີ່ການທູດ ປະຈຳ ສປປ ລາວ ເປັນເວລາ 05 ປີກວ່າ.
   ໃນໂອກາດນີ້, ທ່ານ ປອ. ສູນທອນ ໄຊຍະຈັກ ໄດ້ກ່າວສະແດງຄວາມຊົມເຊີຍຕໍ່ຜົນງານອັນຫຼວງຫຼາຍຂອງທ່ານທູດ ທີ່ໄດ້ປະກອບສ່ວນເຂົ້າໃນການເສີມຂະຫຍາຍສາຍພົວພັນ ແລະ ການຮ່ວມມືລະຫວ່າງສອງປະເທດຣັດເຊຍ-ລາວ ໃນຂົງເຂດຕ່າງໆ, ໄດ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນສະຫະພັນຣັດເຊຍ ທີ່ໄດ້ໃຫ້ການຊ່ວຍເຫຼືອອັນລໍ້າຄ່າແກ່ລາວ ໃນພາລະກິດຕໍ່ສູ້ປົກປັກຮັກສາປະເທດຊາດໃນເມື່ອກ່ອນ ກໍຄືການສ້າງສາພັດທະນາໃນປັດຈຸບັນ ແລະ ຫວັງຢ່າງຍິ່ງວ່າ ການພົວພັນ ແລະ ການຮ່ວມມືລະຫວ່າງ ສປປ ລາວ ແລະ ສ.ຣັດເຊຍ ຈະສຶບຕໍ່ເຕີບໃຫຍ່ຂະຫຍາຍຕົວ ແລະ ມີປະສິດທິຜົນຍິ່ງໆຂຶ້ນ ເພື່ອຜົນປະໂຫຍດຂອງປະຊາຊົນ 2 ຊາດ ກໍ່ຄື ເພື່ອສັນຕິພາບ, ມິດຕະພາບ ແລະ ການຮ່ວມມື ໃນພາກພື້ນ ແລະ ໃນໂລກ.
ທ່ານ ມີຄາອິນ ບາຣານນົບ ໄດ້ສະແດງຄວາມຂອບໃຈຕໍ່ ທ່ານຫົວໜ້າຄະນະພົວພັນຕ່າງປະເທດສູນກາງພັກ ກໍ່ຄືການນໍາຂອງຂະແໜງການອື່ນໆ ທີ່ໄດ້ໃຫ້ຄວາມຊ່ວຍເຫຼືອ ແລະ ອໍານວຍຄວາມສະດວກແກ່ທ່ານ ໃນການປະຕິບັດໜ້າທີ່ການທູດຢູ່ລາວເປັນເວລາ 05 ປີກວ່າຜ່ານມາ. ທ່ານ ທູດ ໄດ້ຕີລາຄາສູງຕໍ່ການແລກປ່ຽນຢ້ຽມຢາມເຊິ່ງກັນ ແລະ ກັນຂອງການນໍາຂັ້ນສູງຂອງ 2 ປະເທດ ໃນໄລຍະຜ່ານມາ ກໍ່ຄື ການພົວພັນລະຫວ່າງ ສາຍພັກ ແລະ ສາຍອົງການຈັດຕັ້ງມະຫາຊົນຂອງສອງປະເທດ ທີ່ມີການພົວພັນ ແລະ ໄປມາຫາສູ່ກັນຢ່າງເປັນປົກກະຕິ.
   ທ່ານ ປອ. ນາງ ສູນທອນ ໄຊຍະຈັກ, ກໍາມະການສູນກາງພັກ, ຫົວໜ້າຄະນະພົວພັນຕ່າງປະເທດສູນກາງພັກ ໄດ້ອວຍພອນໃຫ້ທ່ານທູດ ມີຄາອິນ ບາຣານນົບ ກັບຄືນປະເທດດ້ວຍຄວາມສະຫວັດດີພາບ ແລະ ໄດ້ຮັບຜົນສໍາເລັດໃນໜ້າທີ່ໃໝ່ທີ່ສໍາຄັນຂອງທ່ານ.